04【第二次拖手_男女篇】

【第二次拖手_男仔篇】

捱過咗果個禮拜，要笑嘅都笑完，調咗去第二班上堂，無所謂啦，中一升中二有三分一嘅都响呢班。而且，我仲受到宜家同班同學仔光榮式嘅歡迎，有人潤我威水，有人替我難過，有人話我凄涼，但更多人話我玩得。死讀書嘅就覺得我討厭。頭果十日八日，日日啲 老師特登點名重提呢件事，噏乜春中學生不應談戀愛。喂！大佬，中學生都唔談咁幾時談呀？

 

至於比我拖嘅果個女仔亦唔好過，日日比好多人纏住，美其名叫咩心理輔導，實則又係諸事八卦想問究竟係咪真係拍拖？有冇鍾意過個男仔？有冇咁咁咁？總之，呢一個月時間係我同個女仔都唔好過，响學校無時無刻比人監視住。有時我地離遠見到都會做個無奈苦笑嘅表情。本來佢間中會嚟睇我打波，間中拍下我膊頭講下笑講下廢話互相整古下。宜家唔得啦，已經好似兩粒反轉咗嘅磁石，要互相排斥。

 

仲敢再拖手？ 你都痴線嘅，點解唔敢？所謂，君子拖手十年未晚，我搵緊機會咋。事隔兩個幾月，丟淡晒，開始如常，訓响度個主任已經無再借頭借路捉我訓話，其實果陣我認為呢個單身貌似五十但聽聞得37歲嘅阿Sir 係有意想向我討教拖女仔手心得。超 ，你虚心啲 問我咪教你囉，你鬼鬼鼠鼠咁，得鬼閒教你。唔係見你間中罰我地留堂會請下我地食野，真係鬼睬你。

 

調咗呢班有啲 新面孔係上年中一未見過嘅，男女校當然有一半係女仔。拖過一次發覺女仔手係唔同啲，細啲，柔軟啲，哈，小息企响四樓望落操場，全校有二百幾對手晌下面等緊我拖，拖邊隻好呢？嘻，人細鬼大？ 我認喎，有乜問題？ 再拖就唔好咁張揚同比人見到，只不過，咁做又似乎唔係好合符我個性，Fans 們可能會失望，再諗諗先。

 

我平時返學嘅遲到次數，問中走堂走咗去混入第二班上堂呢啲眾所周知，唔交功課同周不時答非所問製造搞笑場面儲埋嘅老師印像分令我又要再入訓導室。仲開始有同學有樣學樣。每次入去嘅人數逐漸增加，開始要重點嚴懲幾個慣犯殺一儆百。幾個？當然有我份。對慣訓導主任之後我已經摸熟佢套模式，有其他人在場佢係好嚴肅，伶丁得我同佢？ 佢成日都忍唔到笑。

 

我有時會問佢啲 普通野，關於，「呀，阿Sir 點解你揀教書嚟做？唔悶架咩？你半世人都晌學校未離開過喎。」激到佢要澄清，「咩半世？係三份一，阿Sir 仲好後生。」我：「係？但你已經有唔少白頭髮喎，又火車軋，嬲起上嚟啲皺紋一咋咋走晒出嚟，有好多同學仔估全校年紀最大嘅老師係你喎。」總之，單對單嘅時候我係煩到佢無時停。而有時佢見硬嘅嚇我唔到就用軟功，話我：「將啲 心機放晌書度，讀到博士都得啦，乖啦，唔好咁多口」。我：「哦？哎哟，咁就慘囉，咪學咗你咁比人禁固咗响學校半世人都唔知囉」。一味提住佢年紀，哈哈。

 

訓導主任，教過我嘅老師都異口同聲話我係天資聰敏，可惜頑劣不堪，罰去操場跑步一定跑跑下唔知跑咗去邊，同我講親道理就梗諸多歪理反駁，問我功課又唔係唔識，但總係答埋啲 另類答案。「秦始皇點解起萬里長城呀？」我：「有得踩滑板囉，你諗下，起好之後可以踩足成日喎，而且佢只係Up，你班友起之嘛，佢長命啲 可能再起多幾條添吖。^^」

 

我呢啲 強項响年終嘅【高低年班辯論比賽】就大派用場，未出場已經好多fans 吶喊助威，題目「錢係咪萬能」？抽到反方？無所謂啦，「你地數一萬樣唔重覆嘅野先，就算九千幾都唔當一萬喎，讀過數學未吖你地？裁判佢地數唔切嘅話就當我地赢，請計時」。

 

到最後隊友結案陳詞時我仲有絕招。我話：「錢如果係萬能……。」我企身拖住隔離同組女同學隻手再舉高，「我就唔會比人罰洗一個禮拜廁所啦。」台下掌聲雷動。當然，結論判打和。肥校長係裁判之一，發言時講咗大堆廢話，最後補句，「今次數仔再犯校規，我地罰多次佢洗廁所大家話好唔好呀？」 呢個就係我咁出風頭嘅代價，因為連校工都誇讚我洗廁所，係洗得幾乾净，死未？

 

完

【第二次拖手_女仔篇】 

我由細到大讀書成績好好，女仔梗係要咁樣，唔讀好啲書將來點做成功人仕？本來一直相安無事，直到中三果年，一場辯論比賽，一個由初選十五人進行模擬辯論淘呔試開始，一隻唔知邊度走出嚟嘅死狒狒，死猩猩定係死馬騮，又黑又瘦，成日坐唔定，唔係同呢個傾計就同果個講野，目無尊長，毫無禮貌，我係你師姐嚟架！

 

間學校每年都會搞個由低年班挑戰高年班的辯論比賽，往年一般幾乎係三年級對戰五六年級，但今年情况特殊，四班中三都抽唔足十五個人，得十三個。搞到要晌中二搵兩個頂上？上年我讀中二又唔見係咁？冇天理。

 

挑選方式由老師同學提名或自己報名然後投票，隻死馬騮有39票？我咁出眾都係42票，做乜中三嘅會有咁多人投票比隻死馬騮？貪佢識洗廁所吖？  

 

係讀書嘅乖學生一早就要戴眼鏡，有乜可能呢隻死馬騮會冇近視？？九男六女，其中十二個都戴眼鏡。將會晌其中揀三個出嚟比賽，我肯定係其中之一。因為我由前年一年班開始就做準備，準備到今日。

 

辯論技巧唔係你有急才就可以，要做資料搜集，記低重點，搵破綻反擊，係一場攻防戰。隻死馬騮兩手空空就嚟應試，我睇佢點出醜。

 

模擬試講求正反兩方互相對質，一味靠把口有鬼用咩？初試分五組揀每組最叻果個之外再由評判揀個出嚟揍夠六個，再分兩組對決。我呢組出線冇問題，隻死馬騮果組睇佢嘻嘻哈哈當嚟玩咁，睇見就眼火爆。

 

步驟次序完全錯晒，叫佢限定時間係反駁一個指定對像，佢就講哂人地三個，懶好口才咁。咁到你D隊友發言果陣講咩好？拍著佢果兩個真係慘。

【第二次拖手_女仔篇】

點不知真係抽到佢係第六個，仲要同佢拍住同一組，陰功。一直睇佢唔順眼，講咁多次唔好離題搶野講完全唔聽，馬騮即係馬騮，未進化。最後三位評判老師揀三個正選出賽，我，同我同班的高材生，同埋佢。 佢居然有份？我即時投訴，但無用。老師話隻死馬騮如果出場一定好有娛樂性。  

 

到當日坐定定開始等比賽，怯場唔多唔少都有，但望住隻死馬騮果陣就怒火中燒。另一個男仔係同我同班，A班第一，我第三，A班頭十名根本就係全級頭十名，真係唔知隻死馬騮有咩咁叻？

 

但高材生就話由得佢，至多我們幫佢補鑊，佢仲細吖嘛。我頂吖，搞到好似全校得我一個憎佢咁，激氣吖。  

 

開始辯論，題目錢係咪萬能，我地唔好彩抽到反方，有幾分鐘時間我地討論，高材生好淡定咁同我一齊寫低一陣要講嘅野，比好多意見。隻死馬騮一味剩係留意人地衣著，又多廢話，仲唔抄低咁抵死。

 

同預期一樣佢亂講一通，句句野都比人笑，知唔知醜架你？高材生都笑埋一份，仲話，比佢咁搞法我地或者有機會赢。唉，呢個咪成熟嘅表現，睇見隻死馬騮就憎。到我發言仲特登搵佢論點寸佢，根本係人都知萬能只係個代名詞，係白痴先以為一萬樣野，哼! 點吖。  

 

最後高材生發表總結時隻死馬騮望一望我，講咗句借妳隻手一用就企起身up咗堆廢話，搞到台下觀眾鬼殺咁嘈，又打斷高材生發言，最後補充幾句就時間夠。

 

我真係好嬲，完全同我以前想像嘅辯論比賽唔同。到肥校長發言，做中立裁判判今次比賽打和，仲補句要再罰呢隻死馬騮洗廁所，真係大快人心。成日無啦啦借D以拖女仔隻手，應有此報，哼！

 

完。

 

回首頁