08 【 誤 會 2】

可盈生於二月十四，水瓶座，好有水瓶座特質，佢或者知道自己唔屬於天才類型，但對於外表顯露出極天才既計數仔係有幾分仰慕。佢話：( 楊康？哈哈哈，咁木姐姐呢？你結拜兄弟郭靖晌邊呀？) 笑得鬼咁大聲。我o殊佢，叫佢咪嘈。比咗入場費租Locker 租鞋錢，唔好嘥時間，換鞋先，以星期六下午嚟講今日唔算多人，所以鞋既尺碼好易搵啱，好彩。  

幫可盈綁好鞋帶之後開始拖住佢行，當然扶個啱啱學既佢梗係又驚又企唔穩，逐漸變得直情係攬住我咁行出去。我教佢先以最簡單既單腳企穩，企穩企定慢慢座低個身用另一隻腳向後撥，雙手擺動吓保持成個人平衡咁一步步向前。  

其實講乜都冇用，溜咗三個圈可盈仲係雙手搭住我雙手前臂面對面咁望住我而移動，所以當年踩Roller 被喻為拍拖溝女必去既地方，尤其女仔借故就間接示愛。孖碌既溜冰鞋成隻腳咁闊男仔要企穩易過借火，學識重心左右移咁前後溜同埋轉身停已經得，計數仔第一次去就學識，無咩難度。你話玩到人地快溜跳起轉幾個圈落地唔跌既花式表演咁就難，尋常跟大隊個方向轉住踩已經係好基本野。

我地唔係情侶但攬住咗好耐，我話妳點都要試下自己踩，佢仲撲前直頭攬實我話你抱住我踩咪得囉。唉，女仔之家妳真係唔要面。跟住仲話我楊康個名好得意，同埋講：(話個秘密你知吖，趙字係十四劃，唔係十三劃呀，哈哈。）我：( 哼，好喇吓，趙可盈，信唔信我宜家鬆開手由得妳响度比人撞到飛起？)   

 

趙字係十四劃咩？？ 算啦，無謂深究。以前因為身份証設計冇咁複雜，有D 坊間技術可以改動張証上面既資料同埋改相，用張真既改效果好到普通人好難察覺，所以可以賣錢。一般四百到一千都得，我就本住大家方便同易甩手，只搵相熟既二百一張。後來試過漲價到三四千一張都有，有D 沐咀甚至係賣自己果張，跟住自己再去補領，痴線既。  

 

其實過咗大半個鐘，唔知咁轉轉吓轉咗幾多個圈，我係拎住個頭後溜，一直要留意後面有冇撞到人或者比人撞，雖然慢但都開始有D 暈暈地，可盈開始意識到向前踩係舒服D，跟住鬆開我，只係雙手伸直拖住，開始照我頭先咁講咁做，單腳平衡另一隻腳踩，唔蠢喎，漸漸掌握好之後我地可以平排推進，可盈好開心咁話，(阿康，你睇，我識踩啦。）   

咁叫識踩？ 哈，哈哈哈，我問佢妳食咗藥未？佢耶我… 又耶？不過咁樣搞一搞，我地又攬又拖手，如果咀埋既話都幾順理成章。大約半年前計數仔打算識返個女仔做女朋友開始，由文文，重遇我家姐，跟住阿儀，阿儀走咗唔夠一個禮拜，又 ……。拖住可盈响場中順溜，聽住播緊既音樂，幾陶醉，而且氣氛已經令到可盈個身靠向我，微曲的頭髮在飄揚，幾靚，睇真D，可盈除咗纯之外，原來仲幾靚女，點算好？

我有大任晌身，幫我家姐手，而且我對住可盈果D 全部都係大話，我冇可能成世做呢個楊康，諗深一層，我問佢妳咁大個仲讀預科係為乜？吓？考大學？做會計師？妳數學好叻架咩？一連串關於佢既問題，無他既，我諗住幫佢達成佢既願望，分散佢注意從而甩身。

踩完出返嚟行咗陣已經傍晚6點，可盈好自然咁拖住我隻手咁行，我冇話過我鍾意佢，但晌呢刻我又唔想拒絕佢。佢想讀書，但做會計師好似唔一定要讀大學先做到，聽講有D 初中高級既公開試，妳考晒過晒或者已經可以先做會計，做幾年熟咗之後再考會計師都得架喎。  

呢個時候我先知可盈英文原來好好，抛咗堆唔知咩「掃嘥阿池卧扶瓦坑亭」出嚟，我叫佢咪住等等先，我接唔到呀。可盈笑笑口話佢已有打算，細個要幫屋企所以有段時間出嚟做野，到後來阿爸搞生意搵到錢屋企環境好咗，所以可以讀返書，不過屋企唔支持佢讀，話遲早要嫁人生仔，讀咁多書做乜？  

係佢自己想讀，而且，佢知道會計師呢行係無分年齡，做到六七十歲都得。呢番說話出自呢個識咗幾日既可盈把口真係難以置信。我摸摸佢額頭，再捽捽自己耳仔，死囉，妳冇發燒既話就一定係我有幻聽？

呢個時候可盈講到佢熟悉既範疇就好似變咗第個人咁，充滿自信，對眼閃閃發光，日光日白差D 以為佢見到D 我見唔到既野，滴汗。可盈更好驕傲咁撓住我手臂話：( 行啦，姐姐個世界係你呢D 小 dee dee 唔會明白架，哈哈。) 真係比佢激死。

行哂德福再去淘大，買咗兩件衫，可盈問做乜買件樽領衫？ 我話陪我去打枱波吖，手痕，好耐冇打。而可盈提議不如打保齡，碌錢喎。放心啦，姐姐有錢。結果我地要去睇午夜場，旺角卡門。

呢套阿盈話好想睇，或者因為有劉德華張曼玉啩？套戲講古惑仔，講義氣，講一心護住做細既烏蠅最後捨身成仁既大佬華仔，從可盈睇緊戲既面部神情睇，佢都曾經為過兩個咁衝動，一心想做大事既麻煩細佬而煩惱過，而唔知由幾時開始一入到戲院我總係手多多，不過有咗文文果次經驗就知要錫咗咀仔先人地先肯比你任摸任樔，個身仲會軟哂添。  

 

可盈胸部幾大幾挺，腰又幾實冇乜肥肉，比起文文同阿儀，可盈質感上係好好多，但我突然諗起我家姐，真掃興，而且阿盈仲傷感中，過咗手瘾之後都係專心睇戲罷啦。散場後，要送佢返去，夜麻麻搭小巴出旺角，再去上次佢搭車既小巴站，佢話唔使送，我話痴線既，香港治安好好咩？一定要。講完，可盈再嚟一個擁吻，再話：( 阿康，我鍾意你。）

鍾意我？呢句說話呢半年有六個女仔對我講過，我拒絕咗三個，開始有D 麻木。我呢D 咁既男仔如果我係女仔我都鍾意自己啦，何况係妳地。可盈含住舊襪咁講又别有一番情趣。可惜，我有苦自己知，玩玩吓好喇。  

沿途可盈一直依偎住我，只記得佢話咩會收埋隻杯，我估係同頭先套戲劇情有關，我掛住搏懵應該睇漏咗。落車，行到有條長長石級果陣，可盈話：( 揹我。) 就跳上我背脊，真吹漲。小姐妳報大三年的話妳係屬羊咋，等我肚餓隨時就將妳煎咗做羊扒嚟食。  

不過，世事往往出人意表，到可盈屋企樓下遇到一個男仔，係佢識我我又識佢既… 阿立？

 

阿立係咩人？幫我家姐手既其中一個蛋散，為人衝動好勝，多口但又不善詞令成日開口挾著脷。阿立見到我同佢家姐一齊返已經眼超超唔順超，可盈呢個時候就大家姐上身咁一輪咀話佢做乜咁夜返？做乜呢樣做乜果樣……仲話：(叫人啦，康Sir呀。)

 

阿立碌大隻眼？我搶先打完場：( 今日星期六後生仔緊係多節目，兩點幾返我地咪一樣，無事無事。) ( 我同妳家姐係普通朋友，玩夜咗咪送佢返嚟囉，咁咁咁。) 阿立一陣奸笑，話：( 家姐妳返上樓先，我有D 野要同未來姐夫傾傾，阿康Sir 係嘛，啤酒啱唔啱，過果邊吖。♡）  

 

我：(哦，阿盈妳上樓先，我同阿立傾完再打比妳。）

可盈：( 你點知佢叫阿立？）

點知？ 對於講慣大話既計數仔嚟講要拆解唔係問題。但今次可盈個反應出乎意料咁快，佢話：(哦，梗係你個死仔犯咗事比人拉過啦… 。）就衝前拉住阿立件衫拳打腳踼，出手狠辣尤如大婆打小三，呢個可盈果刻我先知我真係睇佢唔透，明明笑起上嚟幾嬌俏可人，惡起上嚟原來咁兇狠。  

 

我隔住佢地中間都擋唔住可盈個來勢，而且覺得佢有D 失去理智咁，因為扯到阿立件衫就嚟爛。點好？我抱起可盈，抱到佢雙腳離地都未得，索性再咀埋去，輕聲咁話：( 深呼吸 ，唔係世界末日，無事既。) 咁可盈先冷静落嚟，真恐怖。

我作個簡單大話，話阿立係晌巴士執到人地個書包做好心拎去差館報案，無事無事。由激動到愕然到冷靜咗之後阿盈開始眼濕濕，佢真係相當眼淺，驚又喊，感動又喊，激動都喊，水造架？ 佢推開我話你地去傾啦，咁夜唔使打比佢就自己一個行返上樓。  

 

我同阿立呆哂咁你眼望我眼，我地去附近開到好夜的士多買啤酒，阿立開口話果個係佢家姐，意思明顯係提醒我唔好搞佢，我答佢我明白，放心，我知點做。阿立仲話佢家姐係有情緒病，起源响當初老豆迫佢唔讀書做野開始，家姐忍忍埋埋咁多年就出問題，其實家姐讀書成績好好，睇書自學都學到好多野，宜家半工讀儲錢想讀大學，所以……。

哦，原來係咁，唔怪之得我第一眼就覺得可盈係個好女仔，都估啱一半。

當年精神病無分得咁仔細，情緒病呢個名詞係後期先出現。查實見可盈幾次係察覺佢有時情緒特别高漲，低落就低得好落。不過，我細個始終係咸濕，有個可以攬住既女仔陪入場睇戲，梗要搵D 甜頭，嘿。

 

我冇心幫人教仔，所以阿立講咩我只係敷衍佢，係呀係呀，直至佢問起羅拉姐(我家姐) 係咪真係我家姐？我抬頭望望個天，我話雖然唔係親家姐，但當佢如果有需要時就算要我去擋子彈亦冇問題，係上天賜比我地既緣份。

不過點都好，我話：( 既然你家姐咁渴望讀書，相信你阿爸都想你讀，咪好好地讀囉，行古惑冇幾多個可以行到一世。) 呢條友仔話牛高馬大仲返學？讀咩吖？由小二讀起吖？我：(哎呀，我頂你吖，做乜你資質同你家姐爭咁遠架？)

阿立知我係咩人，而佢就算點壞都好，親家姐喎，知道既點都唔想自己家姐有咩事。我請佢放心，我識佢家姐的確係偶然既事，更知道可盈係個好女仔，放心啦，我害豬害狗都唔會害你家姐。相對，阿立係幾好奇我有D 咩料，做乜可盈會以為我係差佬？哈哈，秘密。  

第日我打比可盈交待返妳細佬係真係以為我係妳男朋友，特登想試探下我對妳係咪玩玩下，咁囉，妳細佬幾有妳心架。可盈：(咁… 咁… 咁，你點答？你係咪我男朋友？)

我 …… ，我諗野其實唔係咁快，由其可盈呢個問題，答係的話牽連甚廣，仲會打斷我幫家姐呢個願望。答唔係，見過幾次出過街既可盈有種吸引力，楚楚可憐既柔弱美。唉，我話不如出嚟先講。拖返D 時間想清楚，究竟係咪應該坦白同佢講。畢竟，我唔係個咁鍾意講大話既人。  

 

地點 ，今次約晌花墟球場對上既大坑東遊樂場，平日得D 人跑步，地方大，晌果度傾。而且，撞見可盈做兼職既地點亦晌附近，仲有警察俱樂部晌隔離，一五一十講清楚。  

一路行一路諗，仲用銀仔掟公字，掟兩次都公？坦白？但唔係我宜家個意願喎。或者當年我見既女仔唔多，親戚之中冇乜，除咗讀書同學，鄰居，朋友仔既家姐細妹，去開既舖頭入面既妹妹仔姐姐仔，加加埋埋大約百幾二佰個，唔多。  

 

但係可盈有種靚係難以形容，真係隨街識都有好野，或者將來佢成就好高，更確確實實係個發育完成既女仔，我摸過所以知道。  

待續 ....

 回首頁